फोनिज गण्डकीद्वारा घाचोकमा ‘सञ्चार र पर्यटन’ विषयक अन्तरक्रिया

उद्घाटन सत्रमा गण्डकी प्रदेश कानुन, सञ्चार तथा प्रदेशसभा मामिला मन्त्री बिन्दुकुमार थापाले कोरोनाले सुस्ताएको पर्यटक चलायमान बनाउन आमसञ्चारको ठूलो जिम्मेवारी रहेको बताए । उनले आमसञ्चार विधेयक मिडिया हाउस र मिडियाकर्मीमैत्री हुने बताउँदै आमसञ्चार विधेयक संशोधनसहित अगाडि बढाइने बताए । उनले लोककल्याणकारी विज्ञापन समेत मिडियाकर्मीलाई प्रोत्साहन हुने गरी वितरण गर्ने बताए । ‘मिडियाको क्षेत्रमा केकस्ता नयाँ काम गर्न सकिन्छ, सबैको सल्लाह सुझाव लिएर नै अगाडि बढ्ने हो,’ मन्त्री थापाले भने, ‘मिडियाको क्षेत्रमा केही नयाँ गर्ने सोच छ । सबैसँग छलफल भइरहेको छ ।’ घाचोकमा रहेको पर्यटनको सम्भावनालाई उजागर गर्न र पर्यटन प्रवद्र्धन गर्न मन्त्रालय सधैं तयार रहेको उनले बताए ।फोनिज गण्डकीले माछापुच्छ्रेको घाचोक पुगेर विभिन्न सेसनमा अन्तक्र्रिया गरेको हो ।गाउँपालिका अध्यक्ष कर्णबहादुर गुरुङले घाचोकमा पर्यटनको प्रचूर सम्भावना भए पनि विविध कारणले पछि परेको गुनासो गरे । पछिल्लो २ वर्ष कोरोनाले झनै बिथालेको उनले सुनाए । यो अवस्थामा मिडियाको अहम भूमिका रहने उनको भनाइ थियो । सामुद्री सतहबाट १ हजारदेखि ७ हजार मिटरसम्मको यहाँ भूभागमा नेचर, कल्चर र एड्भेञ्चरको राम्रो सम्भावना रहेको उनको भनाइ थियो । अन्नपूर्ण संरक्षण क्षेत्रका कारण धेरै कानुनी प्रावधान छन् । घाचोक हुँदै अन्नपूर्ण ३ र ४, मर्दी हिमाल, गंगापूर्णसम्म पुग्न सकिने भए पनि मिडियाको नजर नपुगेकाले ओझेलमै परेको उनको भनाइ छ । प्याराग्लाइडिङसहित हनी हन्टिङ र प्राकृतिक तातोपानीको विकास गर्न खोजिएको अध्यक्ष गुरुङ बताउँछन् । पर्यटकीय क्षेत्रको विकासका लागि सञ्चारमाध्यमको आवश्यक रहेका कारण घाचोकसहित समग्र माछापुच्छ्रे गाउँपालिकाको विकासमा सञ्चारकर्मीसँगै सहकार्य गर्न तयार रहेको उनले बताए ।