जिल्ला सदरमुकाम गौरमा बुधबार राति अचानक लागेको भीषण आगलागीमा माइस्थानचोकस्थित एक पसलमा लागेको आगो नियन्त्रण बाहिर गएपछि तीन जनाको मृत्यु भएको छ । जिल्ला प्रहरी कार्यालयका अनुसार मृत्यु हुनेमा इस्लाम मियाँका ९, ७ र ५ वर्षका बालबालिका रहेका छन् ।
त्यसैगरी, मियाँका आफन्त मोहम्मद इजराइल मन्सुरी (२६), मोहम्मद इमरान (८) र नसिमा खातुन (२४) जलेको घरबाट बाहिर निस्कन संघर्ष गर्दागर्दै गम्भीर घाइते भएका छन् । उनीहरुको अहिले प्रादेशिक अस्पतालमा उपचार भइरहेको प्रहरी नायब उपरीक्षक सुनिल मल्लले जानकारी दिए ।
आगो नियन्त्रणमा लिन नेपाल प्रहरी, सशस्त्र प्रहरी बल, नेपाली सेना, दमकल विभाग र स्थानीयवासीले घण्टौं प्रयास गरेका थिए भने आगलागीबाट करोडौंको धनमाल क्षति भएको थियो । आगलागीको कारण खुल्न बाँकी रहेको र अनुसन्धान भइरहेको छ । सोही पत्ता लगाउने काम भइरहेको छ ।
