काठमाडौंको सुन्दरीजलमा ल्याइएको मेलम्ची खोलाको पानी शुक्रबारदेखि संघीय राजधानीमा वितरण हुँदैछ ।सिन्धुपाल्चोक जिल्लाको हेलम्बु गाउँपालिका–१ स्थित मेलम्ची खोलाको मुहान अम्बाथानमा सुरुङमार्गबाट पानी खसालिएको हो ।
नालीमा छोडेको पानी मङ्सिर ४ गते गोकर्णेश्वर नगरपालिका–१ सुन्दरीजलमा सुरुङको अन्तिम बिन्दुमा पुगेको थियो ।सुरुमा यो पानी टनेल फ्लसिङका लागि बागमती नदीमा फ्याँकिएको थियो ।
“मेलम्ची क्षेत्रमा ठूलो पहिरोले अम्बाथानको मुहानमा सुरुङको संरचनामा क्षति पुगेपछि गत असारमा सुरुङ बन्द भएको थियो । त्यसैले सुरुङमा रहेको सिल्ट र फोहोर बाहिर निकाल्न सुरुङमा भरिएको पानी वाग्मती नदीमा छाडिएको मेलम्ची खानेपानी आयोजनाका इन्जिनियर रामचन्द्र पौडेलले बताए ।
उनका अनुसार मंसिर ५ गतेदेखि सुरुङमा पानी भरिएको र बिहीबारदेखि सुरुङमा भरिएको पानी महांकालचौर शाखामा छाडिएको हो । लामो समयदेखि सुरुङमार्ग बन्द रहेकाले परीक्षणका आधारमा सुरुमा थोरै मात्रामा मात्रै पानी टनेलको नालीमा झरेको थियो ।
यो पानी सुन्दरीजल पुग्न एक साता लागेको थियो । शुक्रबारदेखि मेलम्ची खोलाबाट दैनिक १७ करोड ५० लाख लिटर पानी सुरुङमा छोडिने आयोजनाका प्रवक्ता राजेन्द्र पन्तले जानकारी दिए ।
आयोजनाले गत चैत ११ गतेदेखि काठमाडौंमा मेलम्चीको पानी वितरण सुरु गरेको थियो । तर, असार १५ गते सिन्धुपाल्चोकमा आएको ठूलो बाढी र पहिरोले आयोजनाको हेडवर्कमा दर्जनौं फिट अग्लो ढुंगा, बालुवा र माटो जम्मा हुँदा आयोजनाको हेडवर्क पूर्णरुपमा क्षतिग्रस्त भएको थियो ।
अम्बाथान इन्टेकमा भत्केको हेडवर्कको निर्माण कार्य सम्पन्न हुन नसकेकोले मेलम्ची खोलाको पानी सुरुङमा खसालेर हिउँदमा मात्रै काठमाडौं ल्याइने भएको छ । खानेपानी मन्त्री उमाकान्त चौधरीले शुक्रबार महांकालचौर खानेपानी ट्याङ्कीबाट मेलम्चीको पानी वितरणको उद्घाटन गर्ने कार्यक्रम छ ।
