अनेसास कोरिया च्याप्टरले प्रत्येक वर्षझैँ यो वर्ष पनि गजल शिरोमणि मोतीराम भट्टको १५७औं जन्मजयन्ती गजल वाचनका साथ भव्य रूपले सम्पन्न गरेको छ ।
भट्टको सम्झनामा चार उत्कृष्ट गजलकारका वजनदार वाचनले कार्यक्रमको गरिमा बढाएको थियो । भर्चुअल माध्यमबाट सम्पन्न सो कार्यक्रममा गजलकारहरू विनोद परिवर्तित, गोपीकृष्ण लामिछाने, लक्ष्मी रेग्मी खनाल र विजय अधिकारीले आफ्ना सुन्दर गजलहरू प्रस्तुत गरेका थिए ।
च्याप्टरका अध्यक्ष ह्यारी बोन्डको सभापतित्वमा सम्पन्न सो कार्यक्रममा अन्तर्राष्ट्रिय नेपाली साहित्य समाज (अनेसास) केन्द्रका अध्यक्ष गोवर्धन पुजाले विशेष अतिथिको भूमिका निर्वाह गरेका थिए । नेपाली साहित्य कौशलको विकासका लागि मोतीरामले आफ्नो जीवनको अत्यन्त कम समयमा गरेको प्रयास अतुलनीय रहेको बताउँदै अनेसास केन्द्रका अध्यक्ष पुजाले श्रष्टाहरूको रचना सारगर्भित र निकै उत्कृष्ट रहेको उल्लेख गरे । च्याप्टरका सल्लाहकार आरएन अधिकारीले संयोजन गरेको उक्त कार्यक्रमको सञ्चालन महासचिव लोकराज न्यौपानेले गरेका थिए ।
भाषासाहित्य, सङ्गीत र कलाको विकास, विस्तार र उन्नयनमा अनवरत सक्रिय संस्था अनेसास कोरिया च्याप्टरले भानु जयन्ती, लक्ष्मी जयन्ती, मोती जयन्तीलगायत विभिन्न सन्दर्भ विशेष कार्यक्रम तथा स्रष्टा सम्मान, कविता प्रतियोगिताजस्ता सम्मेलनको आयोजना गर्दै आएको छ ।
