बोम्जन गुरुङ, सउल कोरिया उच्च रक्तचापको कारण मस्तिष्क पक्षघात जस्तो जटिल रोगले अस्पतालमा अचेत अवस्थामा रहेका उपचारार्थ निर्मल गुरुङलाई कास्की परिवार दक्षिण कोरिया र तमू धीं दक्षिण कोरियाको विशेष पहलमा “निर्मल गुरुङ बचाउ अभियान” शुरु गरिएको छ ।
ईपिएस प्रणाली मार्फत कोरिया प्रवेश गरेको भएपनि हाल उनी अवैधानिक रहेको कारण बिमा सुविधाबाट बञ्चित भएको कारण एनआरएनए कोरिया र एमटियुको कानुनी सहयोगमा उक्त अभियान सञ्चालन गरिएको हो । कोरियाको थाङ्जिन क्षेत्रमा गत ११ तारिक दिउँसो अचानक बेहोस भएका उनलाई छुङ्छङनाम्दो थाङ्जिन छोङ्हाप अस्पताल (당진 종합 병원) मा भर्ना गरिएको छ । अझै अचेत अवस्थामा रहेका उनको रेजरिङ्ग मार्फत नशामा जमेको रगत निकालिरहनुपर्ने र अब तुरुन्तै टाउकोको जटिल खालको अपरेशन गर्नुपर्ने भएको छ ।
उपचार खर्च एक करोड कोरियन वोन (दश लाख नेपाली रुपैंया) आईसकेको अवस्थामा झनै जटिल खालको अपरेशनको लागि ठूलो रकम आवश्यक पर्ने भएको हो । कास्की जिल्लाको भदौरे पुर्ख्यौली घर र पोखरा लेखनाथ २ स्थायी घर भएका उनका घरपरिवारले समेत सहयोग अपिल गरेको हुनाले कोरियास्थित कास्की परिवार र तमू धींले संयुक्त विज्ञप्ति जारी गर्दै आर्थिक सहयोग जुटाउन कोरियामा क्रियाशील विभिन्न संघसंस्था एवं सम्पूर्ण नेपाली दाजुभाई तथा दिदिबहिनीहरुमा सहयोगको लागि अपिल गरेको छ ।
सहयोगको लागि
खाता नं.357-910387-65907 (KEB Hana 081)
खाता बाहकको नाम: Giri Prabin
सम्पर्क नम्बर : 01056370286
(जीवनमरणको दोसाधमा रहेका उनको जीवनरक्षाको लागि २०२१ जनवरी १७ देखि १५ दिनसम्म “निर्मल गुरुङ बचाउ अभियान” सञ्चालनमा छ । बिरामीको अवस्था र अन्य जानकारीका लागी जारी विज्ञप्ति हेर्नुहुन अनुरोध छ ।)
